Fimm hlutir á fimmtudegi.

Stundum er nauðsynlegt að leggjast bara í götuna og leyfa haustinu að umlykja sig. Elsku haustið mitt.

 Mín vegna mætti vera haust alla daga. Alltaf.

Dásamlegur humar úr bústaðarferðinni um síðustu helgi. Ég elska humar! Af hverju er hann svona dýr? Af hverju er ég fátækur námsmaður? LÍN leyfir mér ekki sinu sinni þann munað að splæsa í rækjur. 

Ókei. Ég hefði kannski getað keypt mér einn pakka af rækjum í staðinn fyrir nýjan kjól. Hann er bara svo fallegur. Og ég svo veikgeðja.

Þetta er besta nammi í heimi. Fyrir utan bingókúlur, auðvitað. Fæst í Megastore í Smáralind og ég ætla ekki einu sinni að segja ykkur hvað ég er búin að ryksuga í mig marga poka síðan ég kom hingað.

Ég kom í þessa íbúð á mánudaginn. Síðan þá hef ég ítrekað reynt að sjóða vatn til þess að búa til kaffi. En nei. Ég gat ekki áttað mig á barnalæsingunni á eldavélinni. Bara alls ekki. Fyrr en í morgun - fjórum dögum síðar. 

Ég var orðin fullviss um að ég hefði hlotið einhverskonar framheilaskaða án þess að taka eftir því. 28 ára og tekst ekki að opna barnalæsingar. 

Ég ætti ekki einu sinni að vera segja frá þessu.

Eigið notalegan fimmtudag!

Við heyrumst.

Fimm hlutir á fimmtudegi.

Súkkulaðihúðaðar expressó kaffibaunir - hvílíkt sælgæti! Mæli þó ekki með að stúta heilum svona pakka á einu bretti. Ég verð andvaka eitthvað fram í ágúst.

Fríhöfnin - einn af mínum uppáhalds stöðum. Aðallega vegna þess að þar skiptir engu máli hvaða dagur er eða hvað klukkan slær - áfengi er alltaf við hæfi.

Ég fann þessa dásemd í matvörubúð áðan. Stellu-eplasíder. Maður verður að vera duglegur að vökva sig í þessum hita. Annað gengur ekki. 

Svalirnar mínar eru svo sannarlega ekki af verri endanum.

Þegar ég kemst í naglalökk sem kosta 160 krónur íslenskar er voðinn vís. Ekki skemmir fyrir að þessi lökk eru með þeim betri sem ég hef smurt á mig.

Jæja, sundlaugin kallar. 

Við heyrumst fljótlega.

Notalegt föstudagskvöld.

Sambýlismaðurinn stakk af á tónleika og afkvæmið er steinrotað. Þá gefst nú aldeilis tími til að njóta.

Bara ég, naglalakkið og rauðvínsflaskan.

Dásamlega nærandi og gott fyrir sálina.

Tími til að njóta.

Eigið góða helgi!

Ískaldur unaður.

Ég er að lepja þennan dásemdardrykk í þessum skrifuðu orðum. 

Í þessar drykkjaframkvæmdir þarf einungis frosið kaffi og Amarula. Nú eða Baileys ef þið búið svo vel. Það er eiginlega betra, ég átti það bara ekki til á þessu augnabliki.

Alveg hreint unaðslega gott. 

Mæli með að þið prófið!

Fimm hlutir á fimmtudegi.

Ég ætla ekki einu sinni að reyna að lýsa því hversu undursamlegt þetta Baileys-súkkulaði er. Það er hreinlega taugatrekkjandi að borða það. Hvílík hamingja sem þýtur um æðarnar. Það fæst í Nettó og engin súkkulaðifíkill eða Baileysþambari ætti að láta þessa dásemd framhjá sér fara.

Nýjasta áráttan: kaupa slæður á Ebay og vefja þeim um hausinn á mér í ýmsum útgáfum.

Varasalvar sem gleðja augað talsvert meira en varirnar.

Litli fimm ára furðufuglinn minn veit ekkert betra en brauð með kæfu og kavíar. Það liggur við uppköstum þegar hann neyðir mig út í þennan smurning. Áferðin á kæfunni og lyktin af kavíar. Jakk! Algjörlega banvæn blanda. Hann getur heldur ekki borðað brauðið nema að það sé eitthvað sérlegt listaverk á því. Æ, mér þykir samt ákaflega vænt um hvað hann er dásamlega furðulegur stundum.

Ó, Lucky Charms. Ég stalst til að kaupa kassa í dag. Handa barninu sko. En hann vill bara kæfu og kavíar. Þannig að ég var tilneydd til þess að fá mér eins og eina skál. Sem urðu síðan þrjár. Ekki má þetta fara til spillis.

Eigið ljúft fimmtudagskvöld mín kæru.

Weekend Away.

Ég veit fátt notalegra en að dvelja á hóteli. Ég er algjör hótelpervert. Svo ég tali nú ekki um morgunverðarhlaðborð á hóteli, almáttugur, þá eru sko jólin.

 

 

 

 

  

Ég ætla að eiga dásamlega helgi á Hótel Kea á Akureyri. Og að sjálfsögðu tæma míníbarinn. Að minnsta kosti það sem er áfengt í honum.

Góða helgi!

Facemask Friday.

Ég var að enda við að þrífa af mér einn besta heimatilbúna maska sem ég hef prófað.

Í maskann þarf:

1 teskeið engifer

1 teskeið kanill

1 teskeið hunang

Þessu eru öllu hrært saman þangað til úr verður þykk og fremur ólystug leðja.

Ég notaði verulega útrunnið engifer. Vonum að það komi ekki til með að skaða mig. Kryddhillutiltekt hefur hér með verið sett á dagskrá.

Maskanum er smurt í andlitið og leyft að hvíla þar í 15-20 mínútur. Ég mæli með að þið notið skeið eða einhverskonar spaða til þess að bera þetta á ykkur því maskinn er dálítið klístraður. Það er samt ekkert mál að ná honum af með þvottapoka eða handklæði. 

Húðin á mér er eins og silki eftir þessa meðferð. Besti heimatilbúni maski sem ég hef prófað - og er ég nú ansi dugleg við að mixa hina ýmsu maska. 

Mæli með því að þið prófið.