Fimm hlutir á fimmtudegi

Ég elska Dominos. Ef það væri til land sem héti Dominos þá væri ég drottning þar. Spikfeit og ógeðslega sæl drottning. Löðrandi í osti og brauðstangasósu. Ah, ég elska brauðstangasósu. Og ost. Og pizzur. Mmm.

Sambýlismaðurinn ber hins vegar ekki sömu tilfinningar til Dominos. Því miður. Hann hoppaði þess vegna hæð sína þegar Pizza 67 opnaði á nýjan leik hérna í höfuðborginni. Hann elskar Pizza 67. Og hefur alltaf gert. Mögulega af þvi að við kynntumst á slíkum stað. Og þegar ég segi kynntumst þá meina ég fórum í sleik. Á balli. Sem haldið var í húsakynnum Pizza 67 á Reyðarfirði. Fyrir 10 árum. Einmitt já. 

Allavega. Ég var að tala um pizzur. Ekki sleikingar. Við pöntuðum okkur pizzu og hvítlauksbrauð á Pizza 67 fyrr í sumar. Almáttugur minn. Þvílík og önnur eins dýrð. Glás af áleggi. Tonn af osti. Og hvítlauksbrauðið sko. 27 stig af 12 mögulegum. 

Drottningin af Dominos hefur því afsalað sér titlinum. Pizza 67 verður það framvegis. Nema þegar drottningin stendur sveitt og hnoðar í eina heimatilbúna. Sem gerist, ehm, mjög oft. Hóst. 

Ó, ég keypti svo fallegt skóladót í Söstrene Grene um daginn. Nei, ég er ekkert að fara í skóla. Held ég. Ég er bara með ólæknandi blæti fyrir fallegum ritföngum. 

Að vísu er ég að íhuga að fleygja inn umsókn um doktorsnám. Þarf bara að selja sambýlismanninum hugmyndina. Mér skilst að sem námsmaður sé ég örlítið tæp á geði. Útúrtaugaður koffínfíkill. Með skítugt hár. Og loðna leggi. Óalandi og óferjandi með öllu.

Sem er auðvitað þvættingur. 

Já, þetta er bætiefni fyrir konur á breytingaskeiði. Og já ég er að hakka þetta í mig. Alveg alls ekki á breytingaskeiði. Ég hef heyrt að þetta geri kraftaverk fyrir hár og neglur. 

Og ég er með átta hár á hausnum. Give or take. Og brotnar neglur. Þannig að ég ætla að éta þetta áfram. Þó ég sé ennþá í fullum frjósemisblóma. 

Er ég að vinna erfiðisvinnu? Nei. Er ég að lita mig í hel? Já. 

Þegar ég fæ áhuga á einhverju þá fer ég all in. Ef við slettum aðeins. Ég er auðvitað alveg leiftrandi klikkuð að svo mörgu leyti. Svo stórkostlega manísk. Núna geri ég ekki annað en að versla liti. Í öllum útgáfum. 

Ég neyddist þó til þess að hugsa minn gang í gær.

Ég fór nefnilega í hraðbanka. Til þess að greiða fyrir nýjustu litakaup mín í A4. Af því að ég vildi ekki að fleiri færslur væru sjáanlegar frá þeirri búllu á kortayfirlitinu. Sökum þess að þær eru orðnar svo margar. Og ég ræð ekki við mig. Og ég vil bara eiga alla heimsins liti. Og krítar. Og penna. 

Já, ég get gert saklausa hluti eins og liti og litabækur að áhættuhegðun.  

Nóg um það. Feikinóg.

Ég fékk þetta að gjöf frá Noregi um daginn. Súkkulaðihjúpað Bugles. Já, ég veit að það er til einhver íslensk útgáfa af þessu. Sem bara kemst ekki með tærnar þar sem þetta norska er með hælana. Svona að mínu mati.

Og þið vitið að mitt mat er ávallt óskeikult þegar kemur að sælgæti. 

Annars væri eitt sem ég myndi meta mikils. Frá ykkur. Ég vil vita hvað ykkur finnst skemmtilegast að lesa um. Á þessu bloggi. Eitthvað sem ykkur langar að sjá meira af? Hvað er í uppáhaldi?

Ég þarf innblástur.

Sendið mér snapp - gveiga85. 

Jæja, ég þarf að halda áfram að lita. Þetta litar sig ekki sjálft.

Heyrumst.

Blómabarnið.

Blæti mitt fyrir blómum er agalegt. Blæti mitt fyrir samfestingum er ennþá verra. 

Ég hugsa þess vegna ekki skýrt þegar ég sé blómamynstraða samfestinga. Það slær bara einhverju saman í höfðinu á mér. Mér stendur nokkuð á sama þó ég fái aldrei að borða aftur og þurfi að fara allar mínar ferðir fótgangandi fram að mánaðarmótum. Samfestinginn verð ég að eignast. 

Þessi kom með mér heim úr Gyllta kettinum fyrir helgi. Við erum ástfangin. 

Ég er svo kattliðug í svona samfestingum. Jú og kynþokkafull. Ef það er ekki ástæða til þess að eiga nóg af þeim.

Ég kom einmitt auga á einn í Vila í gær. Svartan með bleiku glitri einhverskonar. Almáttugur hjálpi mér. Opinn í bakið. Svo gullfallegur og einmana á einhverju ljótu herðatré. Aleinn. Hvíslandi nafn mitt svo blíðlega.

Andskotinn. Ég sæki hann.

Heyrumst.

Purple Haze.

Ég er agalega hrifin af þessu maxipilsi sem ég keypti á markaði á Spáni. Það átti að kosta tuttugu evrur en ég gekk í burtu með það fyrir heilar þrjár evrur. Þá var sölumaðurinn búinn að bölva mér duglega og sagðist aldrei hafa lent í eins erfiðum kvenmanni. Á endanum kastaði hann eiginlega í mig pilsinu og gargaði á mig Icelandic Bandita. 

Sambýlismaðurinn stóð álengdar og vonaði að jörðin myndi gleypa sig. Honum finnst það sérstaklega átakanleg lífreynsla að fylgjast með mér prútta. 

Fimm hlutir á fimmtudegi.

Dimmuborgir við Mývatn. Þarna verða allir að koma - þvílíkt umhverfi!

Fallegar stjúpur í skemmtilegum stígvélum.

Ég er ákaflega hrifin af fjólubláu þessa dagana. Ég þarf að læra að búa til krækiberjavín - er það ekki fjólublátt? 

Þessir duttu inn um lúguna hjá mér á meðan ég var í útlöndum. Þökk sé Ebay að sjálfsögðu. Mig var búið að langa í þá lengi og stóðst ekki mátið þegar ég las þetta blogg. Parið var á tæplega 1200 krónur. Ég læt það nú alveg vera.

Ekki komum við áfengislaus að utan. Ó, nei. Við keyptum meðal annars þessa stórglæsilegu vodkaflösku sem inniheldur ætar gullflögur. Það er kanilbragð af vodkanu og ég er búin að vera æsispennt að smakka. Sambýlismaðurinn leyfir mér hinsvegar ekki að opna helvítis flöskuna því hann segir að ég klári allar flöskur sem ég byrja á. 

Það er auðvitað bölvaður þvættingur. 

Eigið gott fimmtudagskvöld mín kæru og góða helgi þið sem hefjið helgina í kvöld.

Í dag.

Þessum ljómandi fína miðvikudegi eyddi ég í dútlerí við myndavegginn minn og óhóflega kaffidrykkju.

Þessir rammar úr Ikea eru alveg dásamlega ódýrir og þægilegir. Tveir rammar í pakka á tæpar 400 krónur og það besta er að þeir haldast uppi á vegg með kennaratyggjói. Fást hér.

Þessir krúttlegu dúskar koma úr Megastore. Fullur poki af krúttlegheitum á 298 krónur. Það má nú aldeilis nýta þá til þess að lífga upp á hina ýmsu hluti.

Sambýlismaðurinn var örugglega búinn að ganga framhjá þessum blessaða vegg fjórum sinnum áðan þegar ég spurði hann: 

,,Jæja, hvernig líst þér á vegginn?" 

,,Hvaða vegg?"

,,NÚ MYNDAVEGGINN!" (þetta var sagt sérlega mjúkum rómi).

,,Jahh, ég tók nú bara ekkert eftir honum."

Já ég sló hann í rot.

Wakkó jakkó.

Æ, Ebay.

Ó, hlébarðamynstur.

Ebay og hlébarðamynstur - það mætti segja að þetta tvennt komist á blað yfir mína helstu veikleika.

Þessi fæst hér. Ég var nokkrum skrefum frá því að splæsa í hann í gærkvöldi. Ég ákvað síðan að mæla mig til öryggis og svo virðist sem ég sé helst til herðabreið. Að vísu var sambýlismaðurinn í hlutverki mælingarmanns. Honum er hreint ekki treystandi. Hann svífst einskis þegar hann veit að einhverskonar kaup eru yfirvofandi. 

Ég þarf að fá annað álit á axlabreidd minni í dag, það er á hreinu. 

Ó, þessi mætti alveg vera minn. Versace fyrir H&M. Gullfallegur. Fæst hér. 

Þessi er skemmtilegur. Mig langar. Fæst hér.

Ég er í eyðslubanni. Ég ætla ekki að kaupa neitt. Alls ekki neitt.

Bits and bobs.

Greip - nýjasta uppáhaldið. Aðallega af því ég las einhversstaðar að það væri ákaflega hreinsandi fyrir lifrina. Ekki veitir af.

Ég - í vel mynstruðum H&M kjól. Með skínandi hreina lifur eftir óhóflegt greipát síðustu daga.

Það er ljúft að vera komin heim. Í dag naut ég lífsins á pallinum hjá foreldrum mínum og fylgdist með pabba dást að kartöflugarðinum sínum. 

Ég gróf upp þessa stórglæsilegu skyrtu hjá Rauða krossinum í dag. Ég varð að kaupa hana. Styrkja gott málefni þið vitið. 

Óóó, elsku mamma mín var að láta stækka myndir af okkur systkinunum til þess að hengja upp á vegg. Já þessi mynd er komin upp á vegg! 

Ég er að íhuga málaferli við hana þar sem ég fæ einkarétt á þessari bölvuðu mynd og get brennt hana á björtu báli. Þessi undirhaka. Þessi hrossahláturssvipur. Almáttugur. 

Eigið gott og gleðilegt laugardagskvöld. Ég hef ekki ennþá ákveðið hvort mínu verður eytt á balli eða í bókalestur.

Ætt glimmer.

Ég er í skýjunum með að hafa fundið leið til þess að borða glimmer án þess að eiga það á hættu að vera lögð inn á stofnun fyrir geðsjúka.

Glimmer búið til úr sykri og matarlit. Vúhú. Nú get ég stráð glimmeri yfir allt sem ég borða.

Til þess að búa til einn skammt í einum lit þarf:

1/4 bolli af grófum sykri

2-3 dropar af matarlit

Sykurinn er settur í litla skál og matarliturinn þar saman við. Síðan er þetta hrært vel og vandlega þangað til allur sykurinn hefur tekið lit. Ég gat auðvitað ekki látið einn lit nægja. 

Sykurinn er síðan settur á ofnplötu. Ég bjó til þrjú ,,hólf" úr álpappír svo ég gæti bakað þetta allt í einu. Þetta fer síðan inn í heitan ofn á 150° í sirka 10 mínútur. 

Út úr ofninum kemur síðan þessi dásamlegi glitrandi sykur í öllum regnbogans litum. Myndirnar gera þessu fíneríi alls ekki nógu góð skil.

Sykurinn er síðan hægt að nota til þess að skreyta kökur eða borða einstaklega gleðilega skál af Cheeriosi. Fyrir fólk eins og mig, sem drekkur meira en það bakar, er gráupplagt að nota sykurglimmerið til þess að skreyta kokteilglös.

(Hugmyndin kemur héðan).