Að vera minnislaus fíkill.

Nei ég hef ekki villst inn í heim vændis og eiturlyfja. Engar áhyggjur.

Ebayfíkn mín er bara orðin slík að ég man ekki orðið hvað ég panta. Það er svo sem ekkert nýtt af nálinni að inn um lúguna hjá mér detti hlutir sem ég get ómögulega munað eftir að hafa fjárfest í. Það hefur skeð oftar en einu sinni.

En það er alveg nýtt að ég panti sama hlutinn tvisvar. Án þess að veita því athygli.

Ég sýndi ykkur þessa dásamlegu hringi hérna á síðasta fimmtudag. Það eru svona sirka þrjár vikur síðan ég fékk þá í hendurnar.

Eh já. Á föstudaginn datt þessi pakki svo inn um lúguna. Sömu hringirnir. Ég hef pantað þá tvisvar. Greinilega með einhverju millibilli fyrst það leið svona langur tími á milli þess sem pakkarnir bárust.

Ég þarf virkilega að hætta að drekka rauðvín.

Og hanga á Ebay.

Ps. Sú sem verður fyrst að skilja eftir komment undir þessa færslu má eiga þessa gullfallegu hringi! Ég hef víst ekki nógu marga putta fyrir þetta allt saman. 

Fimm hlutir á fimmtudegi.

Ég passaði þessa litlu dásemd í morgun. Hún svaf úti í vagni í tvo tíma og snaróða barnapían hennar stóð nánast allan tímann yfir vagninum til þess að vera viss um að hún andaði.

Ég fékk þessa dýrð inn um lúguna um daginn. Pantað af Ebay að sjálfsögðu. 100 krónur íslenskar frá Hong Kong og í mínar hendur. Gjöf en ekki gjald!

Það má einhver vinsamlegast koma og fjarlægja þetta af skrifborðinu mínu. Og líka hina þrjá pokana sem liggja uppi í eldhússkáp. Ég er óstöðvandi þegar þessar möndlur eru annars vegar. 

Ég elska egg. Svo mikið að ég borða þau meira að segja eintóm undir stýri. Það eru alltaf til soðin egg í ísskápnum hjá mér og stundum gríp ég fáein með mér ef ég er að fara á einhvern þvæling. Sérlega handhægt nesti. Og hollara en súkkulaði!

Vissuð þið að það er hægt að búa til dásamlegan kókosrjóma úr kókosmjólk?

Það þarf að geyma kókosmjólkina í ísskáp, helst yfir nótt. Maður mokar svo öllu því sem þykkt er upp úr dósinni og skilur vökvann eftir.

Síðan er þeytt eins og maður eigi lífið að leysa. Ég mæli eindregið með noktun hrærivélar. Ég er handlama eftir þessar framkvæmdir. En þetta er agalega gott - til dæmis út í kaffi. Það má líka bæta kakódufti við rjómann og þá verður þetta dýrindis súkkulaðimús.

Ég hef fengið þónokkra tölvupósta síðan ég bloggaði um hversu seinheppin ég er. Sérstaklega frá stelpum sem hafa lent í því að missa brjóstið á sér ofan í súpuskál. Það er ákaflega hressandi að vita að það eru fleiri eins og ég.

Heyrumst fljótt!

Afkastamikill morgunn á Ebay.

Ég er að berjast um þetta þrennt á uppboði. Ég er bara ekki gerð fyrir svona uppboðsvesen. Ég er alltof tæp á geði - ég sit hérna og öskra á einhver andlitslaus notendanöfn sem sífellt eru að yfirbjóða mig. Aumingja tölvan fær líka sinn skerf af barsmíðum.

Þetta gullfallega eyrnacuff er hinsvegar orðið mitt. Það fæst hér.

Þetta fínerí er líka á leiðinni til mín. Fæst hér.

Ég splæsti nú í tvö svona. Á reyndar tvö fyrir en þau eru bara svo fín. Kostuðu líka agalega lítið. Eiginlega bara gefins, jájá. Fæst hér.

Jæja, ég má ekkert vera að þessu. Ég þarf að sinna þessum uppboðum. Og læra - ég þarf virkilega að hefjast handa við það fljótlega. Geri það þegar ég er búin að vinna öll uppboðin. 

Heyrumst.

Fimm hlutir á fimmtudegi.

Ó, hvað lífið væri fallegt ef svona dásemdir væru fáanlegar á Íslandi. Hvítvín og kokteilar í dós. Það væri ekki verra ef hægt væri að grípa þetta með sér í matvörubúðinni. Eða kannski er þetta bara best geymt í útlöndum. Ekki vil ég verða dagdrykkjumanneskja. Að minnsta kosti ekki áður en ég fer á eftirlaun.

Nýjasti meðlimur fylgihlutasafnsins. Pastellituð perlufesti. Það er nú í lagi að leyfa sér aðeins fyrir haustið. Tjah, eða bara alltaf. 

Besta kombó í heimi. Rauðvín og söltuð graskersfræ. Maður verður að vísu dálítið þyrstur af fræjunum. Það er fyrir bestu að setja tappann ekkert í rauðvínsflöskuna aftur.

Ég gæti drekkt mér í svona pickleskrús. Almáttugur hvað þetta er gott. 

Uppskrift að ljómandi laugardagskvöldi. Rauðvín og doritosdýfa. Ég gæti snætt þetta í öll mál. Alltaf. Mmm.

Eigið ljúft fimmtudagskvöld mín kæru.

Wishbone.

Fæst á Ebay - hér.

Ég splæsti einu svona stykki á mig gærkvöldi - kostaði rúmlega dollara. Svo gott sem gefins í mínum bókum. Það hefði nú bara verið kjánalegt að sleppa því að kaupa það. 

Ég er eiginlega búin að fá nóg af hrossalegum statement hálsmenum í bili. Bara í bili samt. Ég ætla að skipta þeim út fyrir fíngerðara glingur í dálitla stund.

Mig langar líka í fíngerða hringi. Svona örmjóa. Og armbönd.

Mikið er ljómandi að sambýlismaðurinn er að vinna fram á kvöld.

Bara ég og Ebay. Ebay og ég.

Fimm hlutir á fimmtudegi.

Dimmuborgir við Mývatn. Þarna verða allir að koma - þvílíkt umhverfi!

Fallegar stjúpur í skemmtilegum stígvélum.

Ég er ákaflega hrifin af fjólubláu þessa dagana. Ég þarf að læra að búa til krækiberjavín - er það ekki fjólublátt? 

Þessir duttu inn um lúguna hjá mér á meðan ég var í útlöndum. Þökk sé Ebay að sjálfsögðu. Mig var búið að langa í þá lengi og stóðst ekki mátið þegar ég las þetta blogg. Parið var á tæplega 1200 krónur. Ég læt það nú alveg vera.

Ekki komum við áfengislaus að utan. Ó, nei. Við keyptum meðal annars þessa stórglæsilegu vodkaflösku sem inniheldur ætar gullflögur. Það er kanilbragð af vodkanu og ég er búin að vera æsispennt að smakka. Sambýlismaðurinn leyfir mér hinsvegar ekki að opna helvítis flöskuna því hann segir að ég klári allar flöskur sem ég byrja á. 

Það er auðvitað bölvaður þvættingur. 

Eigið gott fimmtudagskvöld mín kæru og góða helgi þið sem hefjið helgina í kvöld.

Pakk og hlakk.

Eftir þrjá daga mun ég sitja í flugvél á leið til Tenerife. Mikið sem það verður fagur dagur.

Ekki fer ég skartgripalaus úr landi.

Ennþá síður fer ég naglalakkslaus eitt eða neitt. Ég er búin að pakka niður tuttugu naglalökkum fyrir fjórtán daga ferð. Ég var búin að troða talsvert fleirum í tösku sko. En að beiðni sambýlismannsins var gerður vægur niðurskurður. Honum er nú lokið - ég get ekki fækkað lökkunum meira. Ég verð að vera við öllu búin.

Ég fer aldrei út fyrir landsteinana án hnetusmjörs og kartöflukrydds.

Lesefni - rómantískt, spennandi og klámfengið. Þarf ég eitthvað meira?

Í dag ætlum við að keyra rúmlega 600 kílómetra til Reykjavíkur. Ég, verandi ákaflega hagsýn húsmóðir, bakaði að sjálfsögðu handa okkur nesti til þess að njóta á leiðinni. 

Heyrumst síðar!

Útsala!

Ég elska útsölur. Ó já.

Það er einmitt gríðarlega góð útsala í vefverslun sem ég held mikið upp á - velvet.is.

Almáttugur - það er til svo margt fallegt. Og unaðslega ódýrt!

Ég lét mér duga að kaupa þetta tvennt. 

Í bili.

Fimm hlutir á fimmtudegi.

Það hafa farið fram strangar snittuæfingar hérna á heimilinu undanfarið. Sambýlismaðurinn heldur nefnilega upp á þrítugsafmælið sitt um helgina. Ég er ekkert sérlega hrifin af snittusmökkun. Ég vil miklu frekar að við veltum fyrir okkur áfengum veitingum og smökkum þær vel og vandlega.

Mamma mín er dásamlegur snillingur sem þekkir mig líklega betur en nokkur annar. Hún kom heim frá Spáni í gær með þennan guðdómlega gjafapoka í farteskinu. Það sem einn poki getur hitt í mark - maður lifandi. Ég hef jú verið með dálítið sjúklega áráttu fyrir Marilyn Monroe frá því í barnæsku.

Í pokanum leyndist að sjálfsögðu ýmislegt gúmmelaði. Þar á meðal þessir naglapennar til þess að teikna eitthvað brjálæðislega fallegt á neglurnar.

Ó og þessi naglalökk. Til þess að búa til svokallaðar kavíarneglur. Já ég sagði kavíar.

Ótrúlega fallegt og skemmtilegt. 

Það er ekki bara mamma sem sér um sína heldur hefur Ebay glatt mig mikið og vel í þessari viku. Ég missti vitið í prófalestri um daginn og pantaði hvert eyrnalokkaparið á fætur öðru. Þau eru loksins að skila sér inn um lúguna og hvílík hamingja. 

Jæja, mín bíður áframhaldandi naglalakksföndur. Og auðvitað hin hefðbundna rauðvínsdrykkja sem tilheyrir fimmtudagskvöldum. Eigið gott kvöld mín kæru.