Afsláttaást.

Ég elska afslætti. Þið vitið að það þarf ekki mikinn afslátt til þess að ég geti réttlætt það að spreða örlítið.

Ég villtist inn á síðuna hjá Heimkaup áðan. Þar fann ég sumarvaralitina frá Maybelline á 20% afslætti og frí sending hvert á land sem er. 

Hérna getið þið verslað ykkur dásamlega varaliti á afslætti. Þeir eru á 1960 krónur stykkið - mig minnir að ég hafi borgað yfir 2500 krónur fyrir svona varalit keyptan í apóteki. 

Árshátíð.

Ég er óneitanlega spennt fyrir kvöldinu - enda veit ég fátt skemmtilegra en að gera mig fína. Að vera fín og drekka vín - mín uppáhalds afþreying.

Jæja, þessar lappir raka sig víst ekki sjálfar.

Gleðilegan laugardag!

Fimm hlutir á fimmtudegi.

Ég gaf eldgömlu hálsmeni nýtt líf með einni naglalakksumferð. 

Veggurinn á skrifstofunni minni er í vinnslu. Það er agalega gott að kíkja á þetta veggspjald þegar maður er við það að bugast og klóra úr sér augun.

Eitthvað sem nauðsynlegt er að minna sig á endrum og sinnum.

Ég get nú ekki státað mig af því að vera ein af þeim sem skreytir fyrir páskana. Ég stóðst samt ekki mátið þegar ég sá þessar gullfallegu greinar í Krónunni í gær. Búntið af þeim kostaði líka voðalega lítið. 800 kall, það hljóta að teljast kjarakaup.

Ah, nýr varalitur. Bleikur, skær og fagur. Ég mæli með því að þið kíkið á sumarlitina frá Maybelline - þeir eru unaður á að líta!

Notalegt vinkonukvöld í uppsiglingu. Hvítvín, maskar og Maltesers. Mjög góð blanda.

Eigið gott fimmtudagskvöld mín kæru.

Maskarar á mánudegi.

Ég splæsti á mig nýjum maskara fyrir helgi. Eftir að hafa verið gallharður aðdáendi ,,gula" maskarans frá Maybelline í einhver ár ákvað ég að sleppa fram af mér beislinu og kaupa öðruvísi maskara frá sama merki.

Ég hef notað þennan gula svona næstum daglega síðan 2009 minnir mig. Fremur ódýr og skilar verkinu vel af hendi.

Þessum er ég svo nýbúin að fjárfesta í, Falsies Feather-Look frá Maybelline. Ég er nú eiginlega bara ekkert skotin í honum eftir að hafa notað hann þrisvar. Hann er alltof klístraður að mínu mati og maður þarf eiginlega heilan stauk af eyrnapinnum til þess að drífa upp drulluna sem hann skilur eftir sig í kringum augun.

Svona lítur burstinn á honum út. Hann er eiginlega of mjúkur fyrir mína parta - ef það má orða það þannig. 

Maskarinn er samt ekkert alslæmur - hann gerir alveg helling fyrir augnhárin. Á neðri myndinni var ég búin að strjúka ca. þrisvar yfir þau. En örugglega búin að brúka 12 eyrnapinna til þess að ná maskaranum af stöðum sem hann átti ekki heima á. Hann kostar næstum 3000 krónur - dálítið dýrari en guli félagi minn. Ég myndi að minnsta kosti ekki kaupa hann aftur. 

Mig langar samt ennþá í nýjan maskara - þrátt fyrir farsælt samband við þann gula. Þið megið endilega ráðleggja mér - mér er alveg sama hvað maskarinn kostar. Sambýlismaðurinn splæsir.