Gjafaleikur í samstarfi við Drífu Reynis - sigurvegarar.

Jæja. Ég er búin að draga í þessum ljómandi góða gjafaleik okkar Drífu.

Til hamingju Aldís Stella og Inga (isi3@hi.is). Þið eigið báðar gullfallega hreindýramynd frá Drífu Reynis. Endilega farið inn á Feisbúkksíðuna hennar, skellið á hana línu með heimilisfangi og voilá. Hreindýrið er ykkar. 

Takk kærlega fyrir þátttökuna!

Heyrumst fljótlega.

Þriðjudagar eru Oreodagar.

Endalausar sólarmyndir úr heimahögum mínum fyrir austan eru að buga mig. Nei ég lýg. Ég hef það fínt hérna. Étandi, fitnandi, rignandi niður og deyjandi úr D-vítamínskorti. 

Æ, veðrið skiptir mig engu. Held ég. Ég nýt mín mun betur fyrir framan sjónvarpið en í sólbaði. Ég hef til dæmis farið í sund einu sinni á síðustu 13 árum. Einu sinni! 

Ég nenni ekki sundlaugum þar sem ekki er seldur bjór. Fer bara í sund í útlöndum. 

Já. Það má rigna fyrir mér. 

En að máli málanna.

Oreotilraun dagsins.

Í tilraunina þarf þrennt (magnið fer eftir því hversu mikið þið ætlið að búa til):

Oreo

Reese´s Peanut Butter Cups

Súkkulaði til þess að hjúpa

Tökum Oreoið í sundur. Við erum bara að fara að nota kremhlutana. Mmmm.

Einn Reeses´sbiti settur ofan á.

Ó, augun mín. Mér líður eins og gömlum pervert að horfa á klám.

Bræðum súkkulaði.

Hjúpum dýrðina vandlega.

Inn í ísskáp í drjúga stund. 

Hér þarf engin orð. 

Ég ætla ekki að bera þetta saman við kynlíf með einhverjum eða hvers kyns sleikingar. Ekki í þetta sinn. 

Heyrumst.

Það skemmtilegasta.

Að stýra sjónvarpsþætti er það skemmtilegasta sem ég hef gert. Án alls vafa. Guð á himnum hvað þetta hefur verið skemmtilegt ferli. Lærdómsríkt og stressandi líka. En það er nú ekkert sem eitt rauðvínsglas lagar ekki. Eða þrjú. Eins og myndirnar hér að ofan gefa augljóslega til kynna. 

Guðrún og glasið. Fjári fínt par það. 

Eins gaman og þetta hefur verið þá geri ég mér enga grein fyrir því hvernig þættirnir koma út. Dómstóll götunnar hræðir mig. Ég hef verið tekin nokkrum sinnum fyrir á hinum ýmsu kommentakerfum síðan ég byrjaði að blogga. Alveg virkilega óskemmtileg lífsreynsla. En maður getur víst ekki verið allra. Er það nokkuð?

Ég bind auðvitað allar mínar vonir við að þið hafið gaman að nokkuð óviðeigandi konu. Mjög óviðeigandi á köflum (sorrý mamma). Svona sæmilega drykkfelldri. Sem eldar ekkert nema popp. 

Ég fer í loftið fimmtudaginn 17.júlí. 

Þið náið iSTV á stöð 7 í gegnum dreifikerfi Símans og á stöð 24 hjá Vodafone. 

Jæja. Ég og afkvæmið erum að éta ostapopp og horfa á jólamynd. Já í júlí. 

Heyrumst.

Gjafaleikur í samstarfi við Drífa Reynis - Art.

Ég á alveg ótrúlega hæfileikaríka frænku. Hún heitir Drífa og er bæði listamaður og ljósmyndari. Það er hrein unun að fylgjast með henni og sjá hversu dásamlega skapandi og listræn hún er. 

Við hittumst afskaplega hressar á ættarmóti á Seyðisfirði fyrir stuttu og ákváðum að gera eitthvað skemmtilegt saman. Úr varð þessi ágæti gjafleikur. 

Drífa teiknar alveg hrikalega flottar myndir.

Þær má kaupa í Gullabúinu á Seyðisfirði eða með því að hafa samband við hana beint í gegnum Facebooksíðuna hennar. Þar getið þið einnig skoðað fleiri myndir. 

Í þessum gjafaleik ætlar Drífa að gefa tveim stálheppnum lesendum eina A4 mynd. Þessir brjáæðislega heppnu lesendur sem ég kem til með að draga út geta valið sér eina mynd af þessum fimm hérna fyrir ofan. 

Sjálf er ég yfir mig ástfangin af gíraffanum og þykir nokkuð líklegt að einn slíkur verði kominn upp á vegg í Breiðholtinu áður en langt um líður.

Þessi gjafaleikur er með hefðbundnu sniði.

1. Þið farið inn á síðuna hennar Drífu og smellið í eitt læk.

2. Þið skiljið eftir comment hérna fyrir neðan færsluna. Hlekkurinn í gráa kassanum. Ef það virkar ekki þá getið þið skilið eftir línu á Facebook og ég set ykkur inn. Þið megið endilega taka fram hvaða mynd ykkur þyrstir einna helst í. 

Einfalt mál.

Þið megið líka vera sæt og deila leiknum. 

Dreg eftir viku.

Heyrumst.

Hádegisverður fyrir einn.

Fyrir einn, tjah - mögulega tvo. Tvo matgranna. Sem ég er ekki. Alls ekki.

Þessi uppskrift kemur frá einni úr saumaklúbbnum mínum fyrir austan.

Salsa með kotasælu (lítil uppskrift)

1 lítil dós kotasæla

Rúmlega hálf krukka af salsasósu

1/2 rauðlaukur

1/2 paprika

1/2 gúrka

1 tómatur

Smyrjið kotasælunni í botninn á litlu eldföstu móti. Salsasósan þar ofan á. 

Saxa grænmetið. Blanda því saman. Hella yfir.

Voilá!

Þetta salsa er gott með öllu. Hrökkbrauði, Doritosi eða bara hakka það í sig með skeið. Beint upp úr fatinu. 

Ég hefði nú skorið grænmetið smærra ef ég sæti ekki ein við átið. Á náttsloppnum. Klukkan þrjú að degi til. Að þamba 2ja lítra Pepsi max af stút. 

Agalega ferskt og gott. 

Á morgun ætla ég að bjóða ykkur upp á dásamlega fínan gjafaleik. 

Ekki missa af því.

Heyrumst.

Fimm hlutir á fimmtudegi.

Glimmernaglalakk. Minn besti vinur og helsti óvinur. Dásamlega fallegt en ó svo óþolandi. Það er eiginlega fátt erfiðara en að ná þessum fjanda af nöglunum. Næstum eins og að fæða barn. 

Það eina sem dugar er að bleyta bómullarhnoðra í acentoni, leggja á nöglina og pakka henni inn í álpappír. Gefa þessu sirka fimm mínútur og fokking glimmerið rennur af. 

Stundum borða ég alveg hollt. Fátæklegt salat fékk alveg dásamlega andlitslyftingu um daginn þegar ég smellti þessum ostaflögum yfir það. Þetta er einhver svona þurrkaður ostur. Held ég. Ég veit ekki. Ostur er góður í hvaða formi sem er. Gæti baðað mig upp úr mygluostum alla daga. Alltaf. 

Uppáhalds hárgreiðslan þessa dagana. Þarf ekki einu sinni að greiða mér. Hárband á hausinn og troða hárinu ofan í. 

Fæða fyrir sálina. Þegar sálin er lúin þá er þetta eina leiðin til þess að lyfta henni upp. 

Eh. Næstum eina leiðin. Þetta er fjári fín leið líka.

Nei. Ég kaupi aldrei dýrt vín. Þetta rennur allt jafn auðveldlega ofan í mig. Óþarfi að spreða. 

Ég var að skrölta um Smáralindina í dag. Datt inn í Megastore að venju. Þar fann ég þessa ljómandi fínu poppskál. Popp er auðvitað ein helsta uppistaðan í fæðu minni. Ég þarf að eiga fallegt ílát.

298 krónur. Ég læt það nú eiga sig. 

Ó, ég fann líka Kool-Aid í Megastore. Ég ætla mér nú ekki að drekka það óblandað. Nei. Ég ætla í einhverjar stórfenglegar kokteilatilraunir með það um helgina. Sjáum hvað setur. 

Heyrumst.