Sunnudagur til sælu.

Ég er afar lánsöm þegar kemur að vinum mínum. Þeim finnst öllum gott að borða. Mikið og óhollt. Eins og undirritaðri. Það þurfti ekki nema eitt símtal í gærkvöldi og ég var komin í Hafnarfjörð að elda svínfeita hamborgara löðrandi í bernaisesósu.

Nei allt í lagi. Það voru ekki bara snæddir hamborgarar. Þessi snæðingur var tekinn alla leið fyrst að bernaisesósan var á annað borð á matseðlinum.

Ekki borðar maður hamborgara án þess að hafa franskar. Það er bara eins og að fá sér epli án hnetusmjörs. Ekki hægt.

Mér finnst ákaflega skemmtilegt að koma á falleg heimili. Sérstaklega ef þau prýða kertastjakar sem eru dýrari en allt mitt innbú. Þegar ég flutti suður í haust komst ég einmitt að þeirri sorglegu staðreynd að allar mínar föggur komast í einn lítinn Yaris. Allt. Ég er 28 ára og allar mínar veraldlegu eigur passa í bíl á stærð við sæmilegt kvenmannsveski. 

Þetta var prýðilegt kombó. Mozzarellastangir og bernaisesósa. Það er ekki nóg með að okkur finnst gott að borða óhollt heldur höfum við einstakt lag á því að gera óhollan mat miklu óhollari. Ef svo má að orði komast.

Afskaplega gott. Já ég borðaði allt sem er á disknum. Og meira til. Virkilega huggulegt kvöld í góðum félagsskap.

Í dag er nýr dagur og í kvöld fer ég á fyrstu æfinguna í stórskemmtilegri íþrótt. Meira um það síðar. Já og ég ætla líka að borða hollt. Frá og með núna. Oreokexið sem ég borðaði í morgunmat var dómgreindarleysi. Ég var líka hálfsofandi og sá ekkert hvað ég var að borða.

Frá og með núna. Hollt.

Heyrumst.