Matarvenjur.

Ég hef ýmsar matarvenjur sem þykja sérstakar. Ókei, furðulegar.

Ég dýfi stundum saltstöngum í svínfitandi súkkulaðihnetusmjör. Þetta er gott. Ekki einu sinni voga ykkur að dæma þessar gjörðir áður en þið prófið! 

Já. Annað slagið dýfi ég líka saltstöngum í hreina AB-mjólk. Mögulega hefur líka sést til mín fá mér væna skál af AB-mjólk og brjóta fullt af saltstöngum út í hana. Mögulega já.

Þetta er sannkallað hnossgæti get ég sagt ykkur. Gulrætur dýfðar í KEA karamelluskyr. Ég er meira að segja að gæða mér á svona gúmmelaði í þessum skrifuðu.

Toffee Crisp. Uppáhalds súkkulaðið hans pabba míns. Stundum kaupi ég eitt stykki í einhverju nostalgíukasti. En ég tek ekki pappírinn bara utan af og borða það. Ó, nei.

Ég strípa súkkulaðið, skelli því á disk og inn í örbylgjuofn í eina mínútu. Svo nýt ég dýrðarinnar með skeið. 

Ah, himnaríki. Himnaríki segi ég!

Maísbaunir. Ég borða þær beint upp úr dósinni. Ég skoppa stundum inn í eldhús og gríp með mér skeið og dós af maísbaunum. Eins og ekkert sé sjálfsagðara. Bara eins og að fá sér jógúrt.

Fyrir utan þetta hérna að ofan þá klíni ég auðvitað hnetusmjöri á allt. Í hádeginu í gær borðaði ég einmitt kjúklingabringu með hnetusmjöri. Það var nú bara alveg ljómandi.

En já. Ég er forvitin. Hafið þið einhverjar furðulegar matarvenjur?

Endilega látið vaða í kommentin!

Heyrumst fljótt.