Fimm hlutir á fimmtudegi.

Ég náði nýjum hæðum í speglamyndatökum um daginn. Speglamynd í Tom Dixon. Tom Dixon sem ég myndi hugsanlega fremja morð fyrir. Eins lítinn áhuga og ég hef á öllu tengdu innanhússhönnun þá er eitthvað við þetta ljós sem fær hjarta mitt til að slá hraðar. Talsvert hraðar!

Talandi um innanhússhönnun og áhugleysi mitt á henni. Ég fletti í gegnum þessa bók í Hagkaup í gær og svei mér þá ef hún var ekki bara dálítið áhugaverð. Full af dásamlega fallegum myndum og innblæstri. Ég þigg þessa í jólagjöf. Nú eða Tom Dixon hérna fyrir ofan. Þið ráðið.

Meistararitgerðin mín kom úr fyrsta yfirlestri í gær. Næstu dagar verða dásamlegt partý. Ekki nema tæplega 790 athugasemdir sem þarf að fara yfir. Svona rétt tæplega. 

Jú, rétt ágiskun hjá ykkur - ég er á leiðinni í ÁTVR.

Sjáið hvað þetta er smekkleg og ódýr hugmynd! Fullt af mismunandi krukkum undir kertaljós. Kemur agalega fallega út. Ég tók þessa mynd í matarboði hjá móðursystur minni um daginn. Hún er ákaflega smekkleg kona. 

Ah, ég sem hin handlagna húsmóðir. Nei aldrei. Ég keypti mér kolla í Ikea um daginn. Hvern koll þurfti að setja saman með fimm skrúfum. Það reyndist mér ofviða. Ég byrjaði á því að skera mig á einni skrúfunni. Auðvitað. Ég er svona eins og lítið barn. Ég á ekki að vera í kringum hættulega hluti.

Ég neyddist til þess að brjóta odd af oflæti mínu og hringja út liðsauka. Til að setja saman kolla. 

Ég get samt alveg sett saman kolla. Höfum það á hreinu. Ég á bara engin verkfæri. Og tekst augljóslega að slasa mig á skrúfum. Þannig að ég taldi það öruggast að fá einhvern annan í verkið.

Jæja, ég er farin í rauðvínsleiðangur. Þessi ritgerð leiðréttir sig ekki án rauðvíns.

Heyrumst.