Nenni ekki að elda

Hérna eru fáeinar uppskriftir úr þáttunum mínum -  Nenni ekki að elda - sem hófu göngu sína á iSTV í júlí 2014. Fleiri uppskriftir má svo finna í bókinni minni sem ber sama nafn. Hún kom út þann 27.nóvember sama ár. Hana má meðal annars versla hér.

1. þáttur - Ásgeir Kolbeins.

Ekki svo fljótlegur kjúklingur að hætti Ásgeirs:

3-4 kjúklingabringur 

Appelsínugulur Doritos

2 krukkur ostasósa

1 krukka mild salsasósa

1 krukka medium salsasósa

Rifinn ostur

Kryddið kjúklingabringurnar og eldið við 200° í góðar 20 mínútur. Skerið þær síðan í bita. Myljið Doritos og setjið í botninn á eldföstu móti. Smyrjið krukku af salsasósu yfir Doritosið og einni krukku af ostasósu yfir það allt saman.  Smellið kjúklingabitunum ofan í. Önnur krukka af salsasósu og önnur af ostasósu. Rifinn ostur ofan á herlegheitin og inn í ofn í 25 mínútur.

Snickerspopp:

Þið finnið uppskriftina af Snickerspoppinu hérna. 

2. þáttur - Leoncie.

Indversk eggjakaka.

4 egg

1 poki spínat

1 stykki laukur

Ferskt chilli eftir smekk

Salt

Svartur pipar

Garam Masala

Túrmerik

Setjið spínatið og laukinn í sjóðandi vatn og látið sjóða skamma stund. Bætið söxuðu chilli saman við. Kryddið með salti og pipar. Hrærið saman 4 egg í skál og kryddið með Garam Masala, pipar og túrmerik. 

Hellið spínatblöndunni í sigti og látið vatnið leka af. Jafnið blönduna svo út á pönnu og steikið við vægan hita. Hellið eggjunum saman við og kryddið með salti og pipar. 

Eggjakakan smakkast best með góðu hvítlauksbrauði. Nú svo má einnig narta í ferskt chilli með henni eins og Leoncie vinkona mín gerði.

Súkkulaði- og hnetusmjörspopp.

Rúmlega 1/2 poki Stjörnupopp

1 bolli súkkulaði

1/2 bolli hnetusmjör

1/4 bolli ósaltað smjör

1 teskeið vanilludropar

Súkkulaði, hnetusmjör, smjör og vanilludropar brætt saman í potti við lágan hita. Þegar allt er orðið vel blandað og brætt er blöndunni hellt yfir poppið. Hrærið vel og vandlega þangað til allt poppið er þakið í súkkulaðidýrðinni. Þetta þarf síðan að dvelja í góðar 30 mínútur í ísskáp áður en má njóta.