Benefit They´re Real Mascara.

Ó, hjartans maskarinn sem ég pantaði mér af Ebay. Ég var búin að lesa hina ýmsu erlendu bloggara dásama þennan blessaða maskara þannig að ég varð að panta hann. Mig vantaði líka maskara þannig að þetta var að sjálfsögðu ekki tilgangslaus eyðsla.

Það er ákaflega erfitt að gera mér til hæfis þegar kemur að þessari nauðsynjavöru. Ég er alltaf að kaupa maskara en finn aldrei neinn sem gjörsamlega heillar mig. Ég og guli maskarinn frá Maybelline höfum átt alveg sæmilegt samband síðustu tvö árin - en bara svona sætt okkur við hvort annað, ekkert verið neitt brjálæðislega ástfangin. 

En nú hef ég fundið hinn eina sanna. Það er á hreinu. Þessi maskari er algjör dásemd!

Eitt stykki verulega ómáluð Guðrún Veiga. Hólímólí. Já og horfum fram hjá ólituðu augnbrúnunum. Þær eru ekki til umræðu núna.

Þarna er ég búin að skella tveimur léttum umferðum yfir augnhárin. Ókei - ég lagði augnbrúnirnar aðeins líka. Örlítil skítredding til þess að láta myndina koma betur út. 

Ég bara get ekki dásamað þennan maskara nógsamlega. Hann gerir allt sem góður maskari á að gera og meira til. Ég þurfti að vísu aðeins að læra á hann. Í fyrsta skiptið sem ég notaði hann klíndi ég honum út um allt því það kemur svolítið mikið úr burstanum. En ég er fljót að læra og núna erum við ákafir elskendur. Njótum hvors annars á hverjum degi.

Þessir maskarar fást ekki á Íslandi enn sem komið er. Það er hægt að kaupa þá um borð í flugvélum Icelandair á 2700 krónur.

Minn gullmola fékk ég á Ebay. Hann kostaði ekki nema 1409 krónur hingað kominn. Það er svo sannarlega gjafaverð fyrir maskara.

Hér má lesa það sem Pjattrófurnar segja um hann.

Þessi maskari fær mín meðmæli. Að eilífu. Amen.