Vanilla Mocha Frappuccino.

Laugardagar eru til þess að njóta og gera vel við sig. Þess vegna lagaði ég mér ekki hinn hefðbundna kaffibolla í morgun. Ó, nei.

Ég bauð sjálfri mér upp á svellkaldan Frappuccino og naut mín í botn.

Vanilla Mocha Frappuccino:

1 væn matskeið af skyndikaffi

1 og 1/2 bolli vatn

Hrært saman og sett í ílát sem má frysta og geymt í frysti í að minnsta kosti 4 tíma. Helst þó yfir nótt. Ég mæli með því að þið frystið kaffið bara eins og klaka, þá er auðvelt að ná því úr og betra að setja það í blandarann.

Það má auðvitað líka laga bara sterkt kaffi og frysta einn og hálfan bolla sirka. Að nota skyndikaffi er ekkert heilagt.

Þegar kaffið er frosið og fínt fer eftirfarandi saman í blandara, matvinnsluvél, töfrasprota eða hvað sem þið kjósið að notast við:

Frosið kaffi

1/2 bolli léttmjólk

3 teskeiðar vanilla extract (ég notaði sykurlaust vanillusýróp)

1 teskeið bökunarkakó

1 teskeið sykur

Allt að verða klárt fyrir töfrasprotann. Hérna sjáið þið einnig sýrópið sem ég notaði. Það fæst út um allt, Krónunni, Hagkaup og á ýmsum kaffihúsum.

Örlítill rjómi - það er nú einu sinni laugardagur.

Svona, nákvæmlega svona eiga laugardagsmorgnar að vera.

Mæli með því að þið prófið - þetta er einfalt, fljótlegt og hrikalega ljúffengt.

(Uppskriftin kemur héðan).